ಆಮ್ಚಿ ಮಾತಿ ಆಮ್ಚಿಂ ಮನ್ಶಾಂ – ವಲ್ಲಿ ಮಾಸ್ಟರ್ – ಹ್ಯಾ ಉಪ್ರಾಂತ್ ಅಮ್ಚೆ ಉಗ್ಡಾಸಾಂತ್ ಮಾತ್ರ್

ಲೇಖಕ್
*ಹೇಮಾಚಾರ್ಯಾ ಪ್ರಧಾನ್ ಸಂಪಾದಕ್ ‘ದಾಯ್ಜಿವರ್ಲ್ಡ್’ ಇಂಗ್ಲೀಶ್ ಮಾಸಿಕ್ ಪತ್ರ್ ‘

ಕನ್ನಡ ಸಾಹಿತ್ಯಾಂತ್ ಎಕ್ ಸಾಂಗ್ಣಿ ಆಸಾ – “ಬೊಕ್ಡೇನ್ ಆಪ್ಡಿನಾತ್ಲೊಲೊ ಪಾಲೊ ನಾ, ಸರ್ವಜ್ನಾನ್ ಬರಯ್ನಾತ್ಲೊ ವಿಶಯ್ ನಾ.” ತ್ಯಾಚ್ ಪರಿಂ ಕಿನ್ನಿಗೊಳಿ ವಾರಾಡ್ಯಾಚ್ಯಾ ಕೊಂಕ್ಣಿ ಕ್ರಿಸ್ತಾಂವ್ ಲೊಕಾಂನಿ ಉಲಂವ್ಚೇಂ ಹಾಂವೆಂ ಆಯ್ಕಾಲ್ಲೆಂ ಆಸಾ–“ವಲ್ಲಿ ಮಾಸ್ಟರ್ ನಾತ್ಲೊಲೊ ಸಂಘ್-ಸಂಸ್ಥೊ ನಾ, ತಾಣೆಂ ಆಟಾಪಿನಾ ಆಸ್ಲೊಲೊ ಸಾಮಾಜಿಕ್ ವಾವ್ರ್ ನಾ.“
ಹಾಂವ್ ಬರವ್ನ್ ಆಸಾಂ, ಹಾಲಿಂಚ್ ಸಪ್ತೆಂಬ್ರಚ್ಯಾ೨೧ ತಾರಿಕೆರ್ ಹ್ಯಾ ಸಂಸಾರಾಂತ್ಲಿ ಆಪ್ಲಿ ತಾತ್ಕಾಲಿಕ್ ವಸ್ತಿ ಸಾಂಡುನ್ ಸಾಸ್ಣಾಕ್ ಬಾಳ್ಚ್ಯಾ ಸರ್ಗಿಂಚ್ಯಾ ನಿರಂತರ್ ನಿವಾಸಾಕ್ ಭಾಯ್ರ್ ಸರೊನ್ ಗೆಲ್ಲೆಲ್ಯಾ ಮಾನೇಸ್ತ್ ವಲೇರಿಯನ್ ಆರ್. ಸಿಕ್ವೇರಾ ವಿಶ್ಯಾಂತ್.
ದುಸ್ರ್ಯಾ ದೀಸಾ, ಮಣ್ಜೆ ಆಯ್ತಾರಾಚೆ ಸಾಂಜೆರ್ ಜಮ್ಲೆಲ್ಯಾ ಹಜಾರೊಂ ಕುಟ್ಮಾದಾರಾಂಚ್ಯಾ, ವಾಡ್ಯಾಗಾರಾಂಚ್ಯಾ, ಫಿರ್ಗಜೆಗಾರಾಂಚೆ ಅನಿ ಈಸ್ಟಾಂ ಮಂತ್ರಾಂಚೆ ಸನ್ನಿಧೆಂತ್ ಅಮಿ ತಾಕಾ ಕಿನ್ನಿಗೋಳಿ ಕೊಶೆಸಾಂವ್ ಸಾಯ್ಬಿಣೆಕ್ ಸಮರ್ಪುನ್ ದಿಲ್ಲ್ಯಾ ಇಗರ್ಜೆಂತ್ ಸಾಸ್ಣಾಚೊ ವಿಶೆವ್ ಮಾಗ್ಲೊ. ತಾಚ್ಯಾ ಲಾಗ್ಶಿಲ್ಯಾ – ತಾಚೆ ಸಾಂಗಾತಾ ಥೊಡೊ ತೇಂಪ್ ವಾವ್ರ್ ಕೆಲ್ಲ್ಯಾ ತಾಚ್ಯಾ ಈಶ್ಟಾನ್ ಅನಿ ಕುಂಪಾದ್ರಿನ್, ಆನಿ ಪ್ರಸ್ತುತ್ ಮಂಗ್ಳೂರ್ ರುಜಾರಿಯೊ ಹಾಯ್ ಸ್ಕೂಲಾಚೆ ಮುಖೇಲ್ ಮೆಸ್ತ್ರಿ – ಮಾನೆಸ್ತ್ ಎಲೋಶಿಯಸ್ ಸೊಜಾನ್ ತಾಕಾ ಸರ್ವಾಂ ತರ್ಪೆನ್, ಬೋವ್ ಸಂಪ್ಯಾ, ಉತ್ರಾಂನಿ ಅನಿ ಗದ್ಗದಿತ್ ತಾಳ್ಯಾನ್ ಅಂತಿಮ್ ಶ್ರದ್ಧಾಂಜಲಿ ಪಾಟಯ್ಲಿ.
ತಾಕಾ ವಿದಾಯ್ ಮಾಗೊಂಕ್ – ಜಾತ್ – ಕಾತ್ನ್- ಭಾಶೆಚೊ ಭೇದ್ ಲೆಕಿನಾಸ್ತಾನಾ ಜಮ್ಲೆಲ್ಯಾ ಲೊಕಾಂಚೊ ಜಮೊ ಪಳೆವ್ನ್ ವಿಜ್ಮಿತ್ ಜಾಲ್ಲ್ಯಾ ಹಾಂವೆಂ ಪಾಟಿಂ ಮ್ಹಜ್ಯಾ ಘರಾಚ್ಯಾ ವಾಟೆಕ್ ಲಾಗ್ತಾನಾ, ಮ್ಹಜೆಂ ಕಾಳೀಜ್ ತಾಚ್ಯಾ ಲಾಗ್ಶಿಲ್ಯಾ ದೊಗಾಂ ವ್ಯಕ್ತಿಂಕ್ (ತಾಚಿ ಮೊಗಾಳ್ ಪತಿಣ್, ಸ್ಟೆಲ್ಲಾ ಟಿಚರ್ ಆನಿ ಎಕ್ಲಿಚ್ ಧುವ್ ವಿಯೊಲಾ) ಚಿಂತುನ್ ಕಳ್ವಳ್ಳೆಂ ತರ್ ಮ್ಹಜೆ ನಿರಾಳ್ ಮತಿಂತ್ ಮಾಸ್ಟರಾಚ್ಯಾ ಸಾಂಗಾತಾಂತ್ ಸಾರ್ಲೆಲ್ಯೊ ಘಡಿಯೊ ಅನಿ ಘಡ್ಲಿಲಿಂ ಘಡಿತಾಂ ಪಾಶಾರ್ ಜಾವ್ನ್ ಗೆಲಿಂ. ತಾಂಚಿ ಎಕ್ ಝಳಕ್ ಹಾಂವ್ ಹಾಂಗಾಸರ್ ದೀಂವ್ಕ್ ಆಶೆತಾಂ.
ಮ್ಹಜಿ ಅನಿ ವಲ್ಲಿ ಮಾಸ್ಟಾರಾಚಿ ವಳಕ್ ಜಾಲ್ಲಿ 1975-ವ್ಯಾ ವರ್ಸಾ ಜೆದ್ನಾಂ ಹಾಂವೆಂ ಆಮ್ಚೆ ಪಿರ್ಗಜೆಂತ್ ’ಉಜ್ವಲ್ ಪ್ರಕಾಶನ್’ ನಾಂವಾಚ್ಯಾ ಕೊಂಕ್ಣಿ ಪುಸ್ತಕಾಂ ಪ್ರಕಟ್ಚ್ಯಾ ಛಾಪ್ಯಾಚಾ ಅಪೊಸ್ತಲಾದೆಕ್ ಬುನ್ಯಾದ್ ಘಾಲ್ಲೆಲಿ. ತ್ಯಾ ದೀಸಾಂನಿ ಕಿನ್ನಿಗೋಳಿ ಫಿರ್ಗಜೆಂತ್ ಜಾಯ್ತೆ ಕೊಂಕ್ಣಿ ಬರವ್ಪಿ ಆಸ್ಲೆ ದೆಕುನ್ ತಾಂಚ್ಯಾಚ್ ಮಟ್ವ್ಯಾ ಕಾಣಿಯಾಂಚೆಂ ಎಕ್ ಸಂಗ್ರಹ್ ಪುಸ್ತಕ್ ಉಜ್ವಾಡುಂಕ್ ಹಾಂವೆ ನಿಚೆವ್ ಕೆಲೊ. ಮೊತಿಕುಮಾರ್, ವಲೇರಿಯನ್ ಸೊಜ್ (ರವಿ ಕಿನ್ನಿಗೋಳಿ), ಡೆನಿಸ್ ಮಥಾಯಸ್ (ಕಿಶೊರ್ ಕಿನ್ನಿಗೊಳಿ), ಎಲಿಯಾಸ್ ಕ್ರಾಸ್ತಾ (ರೋಶನ್ ಕುಮಾರ್), ಕಿಸ್ತಿನ್ ಪಾಯ್ಸ್ (ಕಿರಣ್ ಕಿನ್ನಿಗೋಳಿ), ಜೆರಿ ಜೋನ್ ಕ್ರಾಸ್ತಾ, ಮಾಯ್ಕಲ್ ಕುಟಿನೊ, ತಾಚಿ ಭಯ್ಣ್ ಜುಲಿಯಾನಾ ಕುಟಿನೊ (ಆತಾಂ ಬೆಥನಿ ಮೆಳಾಂತ್ ಎಕ್ ಮಾದ್ರ್ ತಿ) – ಅಶೆಂ ತ್ಯಾ ದೀಸಾಂನಿ ಕೊಂಕ್ಣಿ ಪತ್ರಾಂನಿ ಸಾಹಿತ್ಯಾಚಿ ಕ್ರಶಿ ಕರ್ಚ್ಯಾ ಬರವ್ಪ್ಯಾಂಚಿ ಎಕ್ ಪಟ್ಟಿ ತಯಾರ್ ಕೆಲಿ.
ತ್ಯಾಚ್ ಸಂಧರ್ಬಾರ್, ಮ್ಹಜೊ ಎಕ್ ಈಸ್ಠ್ ಜೊ ಅಪ್ಲ್ಯಾ ದುಕಾನಾಂತ್ ಕೊಂಕಣಿ ಪತ್ರಾಂ ವಿಕ್ರಾಪಾಕ್ ದವರ್ತಾಲೊ – ಫ್ರೆಡ್ಡಿ ಸಿಕ್ವೇರಾ – ಮ್ಹಣಾಲಾಗ್ಲೊ – ಮ್ಹಜೊ ಬಾಪುಲ್ ಭಾವ್, ವಲೇರಿಯನ್ ಸಿಕ್ವೇರಾ ಎಕ್ ಬರೊ ಕೊಂಕ್ಣಿ ಬರವ್ಪಿ ಆತಾಂ ಬೊಳಿಯೆಂತ್ಲ್ಯಾ ಸಾಂ ಲೊರೆಸಾಚ್ಯಾ ಇಸ್ಕೊಲಾಂತ್ ಹೆಡ್ ಕ್ಲಾರ್ಕ್ ಜಾವ್ನ್ ವಾವುರ್ತಾ. ತಾಚಿ ಕಾಣಿ ತುಂವೆ ಕಿತ್ಯಾಕ್ ಹ್ಯಾ ಪುಸ್ತಕಾಂತ್ ಪ್ರಕಟ್ಚ್ಯಾಕ್ ವಿಚಾರುಂಕ್ ನೊಜೊ? ತಾಕಾ ಸೊದುನ್ ತುವೆಂ ಬೊಳಿಯೆ ವೆಚಿ ಗರ್ಜ್ ನಾ, ಕಿತ್ಯಾಕ್ ತೊ ಹರ್ಯೆಕಾ ಸನ್ವಾರಾ ಆಪ್ಲ್ಯಾ ಘರಾ – ಕಿನ್ನಿಗೋಳಿ – ಯೆತಾ ಅನಿ ಆಯ್ತಾರಾಚ್ಯಾ ಮಿಸಾವೆಳಿಂ ಚುಕಾನಾಸ್ತಾಂ ಪಯ್ಲೆಂ ವಾಚಪ್ ತೊಚ್ ವಾಚ್ತಾ. (ಮ್ಹಕಾ ಭಗ್ತಾ ಮೀಸಾವೆಳೀಂ ವಾಚಪ್ ವಾಚ್ಚಿ ಸವಯ್ ತಾಣೆಂ ವಲ್ಲಿ ಮಾಸ್ಟರಾನ್ ಆಪ್ಲ್ಯಾ ಬಾಳ್ ಪಣಾರ್’ಚ್ ಸುರು ಕೆಲ್ಲಿ ತಿ ಆಪ್ಲ್ಯಾ ಮೊರ್ನಾಪರಯಾಂತ್ ಸಾಂಭಾಳ್ಳಿ. ಬಹುಶ ಕಥೊಲಿಕ್ ಪವಿತ್ರ್ ಸಭೆಚ್ಯಾ ಚರಿತ್ರೆಂತ್ ಹೊ ಎಕ್ ದಾಕ್ಲೊ ಜಾಂವ್ಕ್ ಸಾಧ್ಯ್ ಅಸಾ, ಕಿತ್ಯಾಕ್ ಎಕಾ ಲಾಯಿಕ್ ವ್ಯಕ್ತಿಕ್ ಆಪ್ಲ್ಯಾ ಜಿವಿತಾಂತ್ 50 ವರ್ಸಾಂಪ್ರಾಸ್ ಚಡಿತ್ ಆವ್ದೆಕ್ ಮಿಸಾಂಚೆರ್ ವಾಚಪ್ ವಾಚ್ಚೆಂ ಭಾಗ್ ಲಾಭ್ಲೆಲಿ ಎಕ್ ಲ್ಹಾನ್ ಸಂಗತ್ ನಹಿಂ. )
ಮುಖ್ಲ್ಯಾ ಆಯ್ತಾರಾ ತಾಕಾ ಭೆಟ್ಲೆಲ್ಯಾ ತವಳ್ ತೊ ವರ್ತ್ಯಾ ಸಂತೊಸಾನ್ ಅಪ್ಲಿ ಎಕ್ ಮಟ್ವಿ ಕಾಣಿ ಅಮ್ಕಾಂ ದೀಂವ್ಕ್ ಒಪ್ಲೊ. ಹ್ಯಾ ’ಮಟ್ವ್ಯಾ ಕಾಣಿಯಾಂಚ್ಯಾ ಸಂಗ್ರಹಾಕ್ ಕೊಂಕ್ಣಿ ಸಾಹಿತ್ಯಾಂತ್ಲೊ ಶ್ರೇಸ್ಟ್ ಸಾಹಿತ್ಯಕಾರ್/ಕವಿ/ನಾಟಕೀಸ್ತ್ ದೆವಾದಿನ್ ಚಾ. ಫ್ರಾ. ದೆಕೊಸ್ತಾನ್ ಪ್ರಸ್ತಾವನ್ ಬರಯಿಲ್ಲೆಂ, ಜೊ ಖುದ್ಧ್ ಕಿನ್ನಿಗೊಳಿಂತ್ ಇಗರ್ಜಿಮುಖ್ಲ್ಯಾ ಎಕಾ ಘರಾಂತ್ ಜನ್ಮಾಲ್ಲೊ. (ಆತಾಂ ಹಾಂಗಾಸರ್ ’Churchgate Palace’ ನಾಂವಾಚೆಂ ವಸ್ತೆ ಸಂಕೀರ್ಣ್ ತಯಾರ್ ಜಾತೇ ಆಸಾ) ವಾಲ್ಲಿ ಮಾಸ್ಟರಾಚ್ಯಾ ಸೂಚನಾಖಾಲ್ ಅಮಿ ಹೆಂ ಕಿನ್ನಿಗೊಳಿ ಫಿರ್ಗಜೆಚ್ಯಾ ಬರವ್ಪ್ಯಾಂಚೆಂ ಪುಸ್ತಕ್ ತ್ಯಾ ವೆಳಾರ್ ವಿಗಾರ್ ಜಾವ್ನಾಸ್ಲೆಲ್ಯಾ ಮಾ/ಬಾಪ್/ಲೊರೆನ್ಸ್ ವಿ. ಎಮ್. ಫೆರ್ರ್ನಾಂಡಿಸ್ ಅನಿ ಸಹಾಯಕ್ ವಿಗಾರ್ ಮಾ/ಬಾ/ಕ್ಸೇವಿಯರ್ ಪಿಂಟೊ (ಆತಾಂ ಕೆರೆಕಟ್ಟೇ ಸಾಂತ್ ಆಂತೊನಿ ಪುಣ್ಯಕ್ಶೇತ್ರಾಚೆ ವಿಗಾರ್) ಹಾಂಕಾಂ ಸಮರ್ಪಿತ್ ಕೆಲೆಂ ಆನಿ ವಿಗಾರಾನ್ ಬೋವ್ ಸಂತೋಸ್ ಪಾವೊನ್ ಆಮ್ಕಾಂ ಧಾ ರುಪಯ್ ಇನಾಮ್ ಜಾವ್ನ್ ದಿಲೆ. ಹ್ಯಾ ಐವಜಾನ್ ಅಮಿ ಧಾ ಬರವ್ಪ್ಯಾಂನಿ ಲಾಗ್ಶಿಲ್ಯಾ ’ರಾಮ ರೆಸ್ಟೊರೆಂಟಾಂತ್’ ಕಾಫಿ – ಫಳಾರ್ ಕೆಲೊ. ತ್ಯಾ ದೀಸಾಂನಿ ಹೊ ಎಕ್ ವ್ಹಡ್ ಐವಜ್ ಮ್ಹಣಾಜೆ.
ಆಶಿ ಜಾಲಿ ಅಮ್ಚಿ ವಳಕ್ ಅನಿ ತ್ಯಾ ಪಾಟ್ಲ್ಯಾನ್ ಜಾಯ್ತ್ಯೊ ನವ್ಯೊ ಸಂಗ್ತಿ ಮ್ಹಜೆ ಹೆಳ್ಕೆಕ್ ಅಯ್ಲ್ಯೊ – ಎಕ್, ತೊ ಮ್ಹಜ್ಯಾ ವಡ್ಲ್ಯಾ ಬಾವಾಚೊ ಸಹಪಾಟಿ (Classmate) ಜಾವ್ನಾಸ್ಲೊ ತರ್ ಅನಿ ತಾಚಿ ಎಕ್ಲಿಚ್ ಭಯ್ಣ್ ಲಿಲ್ಲಿ ಮ್ಹಜ್ಯಾ ವಡ್ಲ್ಯಾ ಭಯ್ಣಿಚೇಂ ಸಹಪಾಟಿ ಜಾವ್ನಾಸ್ಲೆಂ. ಹ್ಯಾ ಉಪರಾಂತ್ ಥೊಡ್ಯಾ ವರ್ಸಾಂನಿ ಹಾಂವೆಂ ಗಾಂವ್ ಸೊಡ್ಲೊ ತರ್’ಯಿ ತಾಚೊ ಸಹವಾಸ್ ಸಾಂಡ್ಲೊ ನಾ.
ತಾಣೇಂ ಕೆಲ್ಲ್ಯಾ ಸೆವೆವಿಶ್ಯಾಂತ್ ಯಾ ಸಂಘ-ಸಂಸ್ಥ್ಯಾಂನಿ ತಾಚ್ಯಾ ಮೆತೆರ್’ಪಣಾವಿಶ್ಯಾಂತ್ ಹಾಂವ್ ಕಿತೆಂಚ್ ಬರಂವ್ಕ್ ವಚಾನಾ, ಕಿತ್ಯಾಕ್ ತಾಕಾ ಫಿರ್ಗಜೆ ತರಪೇನ್ ವಿದಾಯ್ ಮಾಗ್ಚ್ಯಾ ವಗ್ತಾ ಎಕ್ ಖರೊ ಸಮಾಜಿಕ್ ವಾವ್ರಾಡಿ ಜಾವ್ನ್ ತಾಣೆಂ ಕೆಲ್ಲ್ಯಾ ವಾವ್ರಾ ವಿಶಯಾಂತ್ ಫಿರ್ಗಜೆಚ್ಯಾ ಗೊವ್ಳಿಕ್ ಪರಿಶಧೆಚಿ ಉಪಾಧ್ಯಕ್ಶಿಣ್ ಶ್ರೀಮತಿ ಶೈಲಾ ಸಿಕ್ವೇರಾನ್ ತಾಚೆ ವಿಶ್ಯಾಂತ್ ಸರ್ವ್ ಮಾಹೆತ್ ಭಾರಿಚ್ ಸೊಭಿತ್ ರಿತಿನ್ ವರ್ಣಿಲ್ಯಾ.
ಹಾಂವ್ ಓಮಾನಾಚ್ಯಾ ಮಸ್ಕತಾಂತ್ ವಾವ್ರ್ ಕರುನ್ ಆಸ್ತಾನಾ, ಎಕ್ ಪಾವ್ಟಿಂ ಮ್ಹಾಕಾ ತಾಚಿ ಚೀಟ್ ಆಯ್ಲಿ, 1993 ವ್ಯಾ ವರ್ಸಾ ಮ್ಹಣ್ ಮ್ಹಜೊ ಅಂದಾಜ್. ತಾಣೆಂ ಬರಯಿಲ್ಲೆಂ – “ಹಾಂವ್ ಇನ್ಸುರೆನ್ಸ್ ಎಜಂಟ್ ನಹಿಂ, ವ ಬೇಂಕಾಚೊ ಮೆನೆಜರ್’ಯಿ ನಹಿಂ ದೆಕುನ್ ಮ್ಹಜೆರ್ ಉಬ್ಗಾನಾಕಾ. ಹಾಂವ್ ತುಜೊ ಈಶ್ಟ್ ವಾಲ್ಲಿ ಮಾಸ್ಟರ್, ವಿ. ಆರ್. ಸಿಕ್ವೇರಾ. ಆಮಿ ಅಮ್ಚೆ ಫಿರ್ಗಜೆಚೆಂ ಎಕ್ ಪತ್ರ್ ಕಾಡುಂಕ್ ನಿರ್ಧಾರ್ ಕೆಲಾ ಅನಿ ತ್ಯಾ ಪತ್ರಾಕ್ ’ಆಮ್ಚೆಂ ಜಿವಿತ್’ ಮ್ಹಳ್ಳೆಂ ನಾಂವ್ ಥಿರಾಯ್ಲಾಂ. ತುವೆಂ ಹ್ಯಾ ಪತ್ರಾಖಾತಿರ್ ನಹಿಂಚ್ ಬರಂವ್ಕ್ ಜಾಯ್ ಬಗಾರ್ ಕಾಂಯ್ ಥೊಡಿ ಆರ್ಥಿಕ್ ಕುಮಕ್ ಕರುಂಕ್ ಜಾಯ್. ತುಂ ಖುಧ್ ಎಕಾ ಪತ್ರಾಚೊ ಸಂಪಾದಕ್ ಜಾವ್ನ್ ಆಸ್ಲೊಲೊಯ್ ದೆಕುನ್ ಹ್ಯಾ ಪಾಟ್ಲ್ಯಾನ್ ಆಸ್ಚ್ಯಾ ಸಂಕಸ್ಟಾಂವಿಶ್ಯಾಂತ್ ಚಡಿತ್ ಬರಯ್ನಾ. ತುಂಚ್ ಚಿಂತುನ್ ಕಿತೆಂ ಕರುಂಕ್ ಸಾಧ್ಯ್ ತೆಂ ಪಳೆ. ತುಜ್ಯಾ ಮೊಗಾಚೊ ವಲ್ಲಿ. “
ತ್ಯಾ ಉಪರಾಂತ್ ನಹಿಂಚ್ ಹಾಂವೆ ’ಆಮ್ಚೆಂ ಜಿವಿತ್’ ಪತ್ರಾಂತ್ ಸರಾಗ್ ಬರಂವ್ಕ್ ಧರ್ಲೆಂ, ಬಗಾರ್ ಮ್ಹಜೆ ತಾಂಕಿ ಪ್ರಮಾಣೆಂ ಕಾಂಯ್ ಥೊಡಿ ಕುಮಕ್ ದಾಡಿತ್ ರಾವ್ಲೊಂ. ಸಬಾರ್ ವರ್ಸಾಂ ಪರಯಾಂತ್ ’ಆಮ್ಚೆಂ ಜಿವಿತ್’ ಪತ್ರಾಚ್ಯಾ ಹರ್ ಆಂಕ್ಯಾಂತ್ ಹಾಂವ್ ’ಗಲ್ಪಾಂತ್ಲೊ ಪ್ರತಿನಿಧಿ’ ಮ್ಹಣ್ ಥಿರಾವ್ನ್ ಮ್ಹಜೆಂ ನಾಂವ್, ತಸ್ವೀರ್ ಅನಿ ಮ್ಹಜೊ ಪತ್ತೊ ಅನಿ ಟೆಲಿಫೊನ್ ನಂಬರ್ ತೊ ಪ್ರಕಟ್ತಾಲೊ. (ಹೊ ಸಂಪ್ರಧಾಯ್ ತ್ತಾಚೆ ನಂತರ್ ಪತ್ರಾಚೊ ಸಂಪಾದಕ್ ಅನಿ ಉಪಾಧ್ಯಕ್ಶ್ ಜಾಲ್ಲ್ಯಾ ಲಾಯನಲ್ ಪಿಂಟೊನ್’ಯಿ ಜ್ಯಾರಿ ದವರ್ಲೊ)
ವಲ್ಲಿ ಮಾಸ್ಟರ್ ಆಮ್ಕಾಂ ಸಾಂಡುನ್ ಗೆಲೊ ಪುಣ್ ತಾಣೆಂ ಮ್ಹಜೆರ್ ಕೆಲ್ಲ್ಯಾ ದೋನ್ ಉಪ್ಕಾರಾಂಚೊ ಉಲ್ಲೇಖ್ ಕೆಲೊ ನಾ ತರ್ ಹೆಂ ಲಿಖಿತ್ ಅಧುರೆಂ ಉರ್ತೆಲೆಂ. ಹ್ಯಾ ತರಫೆನ್ ಹಾಂವ್ ತಾಚೊ ೠಣ್ಕಾರಿ ಜಾವ್ನ್ ಉರ್ತೊಲೊಂ, ತೆಂ ಖಂಡಿತ್.
2000 ವ್ಯಾ ವರ್ಸಾ ಆಮ್ಚೊ ಮೊಗಾಚೊ ಬಾಪಯ್ ಅನಿ ಧಾ ವರ್ಸಾಂ ಉಪರಾಂತ್ ಅಮ್ಚಿ ಮೊಗಾಳ್ ಆವಯ್ ಆಮ್ಕಾಂ ಸಾಂಡುನ್ ಸಾಸ್ಣಾಚ್ಯಾ ಪಯ್ಣಾಕ್ ಭಾಯ್ರ್ ಸರೊನ್ ಗೆಲಿಂ ತೆದ್ನಾಂ, ವಲ್ಲಿ ಮಾಸ್ಟರಾನ್ ವರ್ತಿ ಜವಾಬ್ಧಾರಿ ಆಪ್ಲೆ ಖಾಂದ್ಯಾರ್ ಘೆತ್ಲಿ. ನಹಿಂಚ್ ತಾಂಚಿ ದೊಗಾಂಚಿ ಮೊರ್ನಾಚಿ ಸರ್ವ್ ವಿಲೆವಾರಿ ತಾಣೆಂ ಕಿನ್ನಿಗೋಳಿ ಫಿರ್ಗಜೆಂತ್ ಕರಯ್ಲಿ, (ಮ್ಹಜಿ ಆವಯ್ ಮ್ಹಜೆ ಬರಾಬರ್ ಮಂಗ್ಳುರಾಂತ್ ವಸ್ತಿ ಕರುನ್ ಆಸ್ಲಿ ತರ್ ’ಯಿ ತಿಣೆಂ ಆಪ್ಲೆ ಮೊರ್ನಾಆದೀಂ ಮ್ಹಜೆಲಾಗಿಂ ಆಪ್ಣಾಕ್ ಕಿನ್ನಿಗೋಳಿ ಫಿರ್ಗಜೆಚಿ ಮಾತಿ ಪಾವೊ ಕರುಂಕ್ ಜಾಯ್ ಮ್ಹಣ್ ಸಾಂಗ್ಲೆಲೆಂ!) ಬಗಾರ್ ದೊಗಾಂಚೆ ಅಂತಿಮ್ ಕ್ರೀಯೆಂತ್, ಸರ್ವ್ ಫಿರ್ಗಜೆಗಾರಾಂ ತರ್ಪೆನ್ ತಾಣೆಂ ತಾಂಕಾ ಸಾಸ್ಣಾಚೊ ವಿಶೆವ್ ಮಾಗ್ಲೊ.
ಹ್ಯಾ ದೋನ್ ಕಾರಣಾಂ ಖಾತಿರ್ ಹ್ಯಾ ಉಪರಾಂತ್ ವಲ್ಲಿ ಮಾಸ್ಟರ್ ಮ್ಹಜೆ ಉಗ್ಡಾಸಾಂತ್ ಸದಾಂಕಾಳ್ ಉರ್ತೊಲೊ ಮಾತ್ರ್ ನಹಿಂ, ಹ್ಯಾ ಸಂಸಾರಾಂತ್ ತಾಣೆಂ ಕೆಲ್ಲ್ಯಾ ಆಸಲ್ಯಾ ಹೆರ್ ಸಬಾರ್ ಬರ್’ಯಾ ಕಾಮಾಂಚೆಂ ಇನಾಮ್ ದೇವ್ ತಾಕಾ ಫಾವೊ ಕರಿನಾಶೆಂ ರಾಂವ್ಚೊ ನಾ ತೆಂ ಖಂಡಿತ್.
ಸಮಾಪ್ತ್

2,220 total views, 16 views today